我们相爱6年
—
—
Twins?-?相愛6年
00:00
04:21
2007丨《我們相愛6年》
【100分丨人生有幾多個廿年】
–
2021年五月四號.順德海駿達城.港樂講樂舉行自己第13場busking.作為三場裡面嘅最後一場.我哋希望係最震撼最癲出現最多全場大合唱嘅一場.於是我哋將組合場安排係尾場.結果亦確實如此.嗰一晚嘅《無盡》《森林》同埋《哪裡只得我共你》係我近半個月翻睇次數最多嘅幾個視頻.嗰一晚好正.但唯一讓我有些許意難平的.是我必須要承認.那個伴我成長.屬於Twins的時代.已經過去了.
那一夜.能勾起全場大合唱的Twins作品寥寥可數.我曾想過.會不會是.那些喜歡Twins的忠粉.大多數已經建立了自己的家庭.他們的那份衝勁.多多少少已經被多年的生活生存所磨平.這些年.那些曾經深深愛著Twins的人.有多少.從少女變成人妻.有多少.從孩子變成孩子的父母.又有多少.耳機裡播放的.還是孖女的歌.
五月四號那一晚.有一幕令我印象深刻.在數不清的濕趴毛巾同埋DJ熒光棒之中.係我十點鐘方向.有一個女仔.帶咗全場唯一一條TWINS#LOL嘅毛巾過嚟.而每當我唱Twins嘅歌.我都會不由自主望向佢.每首孖女嘅歌.佢都會高舉毛巾.與我一起高歌.
如今回想起那一刻.我突然釋懷了.嗯.那個時代過去了便由得它過去了.即使Fans沒有太多機會再聚首.即使Twins基本暫停了出新歌.但那些愛著孖女的人.一直都在繼續愛著她們.只不過我們都習慣將這份愛放在心中罷了.一日Twins.一世Twins
人係需要長時間陪伴的生物.在青春期的一切美好必然會化作一生的美好.因此如果有一日我係shall we talk被採訪.主持人問我.最喜愛嘅組合係邊隊.我諗無論當時我係幾多歲都好.我都會毫不猶豫回答
我最鐘意嘅組合.係Twins
今日.係2021年5月18號.
二十年前嘅今日
我最愛嘅組合正式出道
今日
孖女相愛二十年.
–
兩人2000年雙雙簽約英皇.原本公司冇諗住做組合.但係Mani見到佢哋兩個經常好似孖公仔咁上公司訓練.然後又一齊落堂行街.兩個人又年齡相近.於是乎索性就將佢哋打包出道.2001年5月18號係二人正式出道嘅日子.但當時並未有隊名.只係純粹以一個組合形式出現.孖女第一個公開演出嘅show係2001年六月份英皇幫澳門賽馬會搞嘅《濠江星輝慈善夜》.
陣容真係星光熠熠
–
後來因為兩個人嘅樣貌成日俾人調亂.於是乎英皇就順理成章將組合名改成「Twins」而蔡卓妍英文名叫Charlene.
鐘欣潼英文名叫Gillian
兩個名都係勁唔貼地同勁難讀.當時啲歌迷連妳兩個個樣邊個打邊個都分不清.如果連個名都唔識讀咁仲得了?於是乎公司就用咗二人英文名第一個音節嘅廣東話諧音嚟做佢哋嘅花名.一個叫啊sa.另一個叫阿嬌.易記貼地又入屋.一叫就叫咗廿年.
–
俗語有話.好漢不提當年勇.但好女就冇問題啦.不得不說.未經歷過嗰個年代嘅後生仔女真係唔知Twins風頭有幾勁.對於我哋呢一代八零尾九零頭嘅人而言.當年Twins嘅人氣就等於宜家嘅blackpink
我諗用好勁已經形容唔到孖女.要用好撚勁先得.而且佢哋係一出道就已經巔峰.唔怕得罪講句.同期其他組合連孖女嘅尾燈都見唔到.佢哋破天荒成為叱咤頒獎禮第一隊可以攞齊「新力軍組合金獎」同埋「叱咤樂壇我最喜愛組合」嘅組合.
2002年.出道啱啱滿一年.Twins就舉行咗一連三場嘅首次紅館個唱.當年尚未滿20歲嘅蔡卓妍成為紅館有史以來最年輕係紅館開個唱嘅女藝人.到宜家阿sa依然係呢個記錄嘅保持者.佢哋係全港首位擁有主題K房間嘅藝人.佢哋嘅寫真集創下香港史上最高銷量紀錄.嗰一年.係萬眾矚目嘅勁歌金曲最受歡迎女歌手投票中殺入最終三強.最終惜敗於當時頂流楊小姐.但千嬅彼時已經出道七年.Twins出道兩年都未夠.已經有如此成績.唔怪得當時媒體稱Twins係炮彈式上位
–
2007年.Twins出道六年.推出紀念精選專輯《我們相愛6年》.大碟主題有蔡一智擔任創作總監.靈感來自Twins一路走來如同戀人由相識.相愛到廝守終身的全過程.於是大碟封面以及內頁都以二人的婚紗照作主題.我好鬼鐘意呢輯相.初中嘅時候仲用嚟做過手機桌面.當時仲係用緊諾基亞…..
–
6週年主題曲《相愛六年》由伍樂城作曲.林夕填詞.我諗連填詞嘅林老爺都冇諗到.呢份歌詞除咗提及年份嗰一句.其他任何一粒字.到十四年後嘅今日依然適用.呢首歌成為Twins獨一無二嘅主題曲.從「六歲很快過」.唱到「十五歲很快過」.再唱到今年.「廿歲很快過」
呢對孖女
依然不捨不棄.
依然沒有猜和忌.
任世態如何紛擾
Twins依然是最好的Twins
–
「飲歌跟你合唱
唱到世態的轉變都看過
仍是那樣諧和」
從對戀愛萌芽的《明愛暗戀補習社》到為愛勇敢的《風箏與風》再到蛻變成熟的《女人味》.那些年孖女合唱的每首飲歌.訴說過聽者多少故事.埋藏了她們多少辛酸淚水以及動人事跡.但即使世態怎樣轉變也好.直至今天.Twins依舊如初見般美好.
「廿歲很快過 又似不快過
驟眼彼此也大個
可愛在每分鐘也不枉過」
在當時看來.六歲是一段不長也不算短的時間對吧.但不經不覺之間.重新回首.時間又過去了十四載.這對少女組合.已經陪我們走過了二十個年頭.不止是她們.連聽她們的我們.也逐漸變得大個了.歲月雖不由人.但幸好.能聽著Twins度過.似乎每分鐘也未算枉過.
「回望身世 因工作未顧安危
被天氣炎涼洗禮 卻有你天使般安慰
共渡浮世 有幸攜手便能拋開一切
未來未曾計 大無畏
為了事業念力沒有降低」
回首那些日子.我會為我們是以組合出道而深感幸運.無論在什麼境地之下.我都不會是孤單一個.妳總會在我最需要的時候出現.給我天使般慰藉.幸得與妳共度浮生.不知不覺間.跟妳的情誼.比一切都來得珍貴.我從未計算過未來會怎樣.只想一直跟妳並肩作戰
「像置身銀河 年月飛快過
共你分享對或錯
苦與樂記得生涯怎麼過」
浮沉娛樂圈之中.就如同將自己置身銀河之中.年月不知不覺間便從指尖溜走了.幸好有妳和我分享彼此的一切境況.是好是壞都不要緊.因為我知道.即使全世界都厭惡我.妳依然會站在我身旁.去對抗全世界.那些甘苦記憶.會伴隨妳我的餘生.
「從沒心計 天真歲月已一齊
幸福似季候交替
你卻永遠企在旁像護堤
望著時計 便懷念怎樣聯手解決一切
未來未曾計 大無畏
陪你落下熱淚亦撐到底」
我們相識的時候.還沒有名成利就.還沒有今天的一切.因而我們會一直記得彼此最天真的時光並努力將這種純潔的情誼延續下去.無論之後會是何種困境.我都知道妳像我一直無條件保護著你一樣.妳亦會一直在我身旁守護著我.
看著時間逐漸走過.我總是懷念那些與妳一齊聯手闖天下的時光.未來的一切.我未曾深思過.只要是和妳一起.哪怕前路是懸崖或絕嶺.我亦會和妳硬撐到最後.
「假如感激我運氣 不如多得有著你
投緣難講理 歎世界 亦要牽手上機
一人一口氣做到未洩氣 沒法不一起
這種不捨不棄 大過天和地
我肯交換去做你」
我能擁有今日面前的一切.與其歸功於運氣.倒不如說是因為我有著妳.多得有妳.我才可擁有這一切.從結識妳那一刻開始.就註定我們要投緣一輩子.無論到哪兒.我都想牽著妳的手.當我無力時妳拉著我.當妳累了我攙扶著妳繼續往前.這種不捨不棄.比天地還要強大.假如可以的話.我肯交換去做妳.去為妳承受一切傷痛.
「彷如孖女這份愛願叫世間知己
記得不捨不棄 沒有猜和忌
我肯交換去做你 我的感覺也屬你」
我們不是孖女.卻勝似孖女.最初世人經常將妳我認錯.但到現在.真正認錯我們的卻是我們自己.我們的一切都是一樣的.我們的感覺都一樣.妳痛我會痛.妳笑我亦會快樂.二十年了.我們雖然不是每日都見面.但我們的心.從未分開過.妳已長成我心頭上的一塊肉.Twins已經不僅僅是一個組合.它是一個只屬於我們的鎖扣.無論天涯海角.都會將妳我僅僅相連.今生今世.不離不棄.
–
我對Twins嘅記憶.始於三四年級.我記得嗰時小學嘅時候.放寒暑假嘅時候係屋企睇電視.冇節目睇嘅時候就會轉去睇點歌台.成日都會睇到Twins嘅MV.印象最深刻係《眼紅紅》同埋《戀愛大過天》.從嗰陣時開始我就開始鐘意孖女.而且尤其鐘意啊Sa.於是乎開始睇佢哋嘅電影聽佢哋嘅歌.仲會係學校門口嘅士多買佢哋嘅貼紙.貼係書包.筆盒檯面.等等地方.
到初中時期呢份對阿sa嘅喜歡簡直變成迷戀.嗰時全班都知道阿sa係我老婆.而且我仲會有剪報嘅習慣.雖然已經過左十幾年.但係如今呢份剪報依然保存得十分好?.
–
而後來.上天似乎不再眷顧這對從出道開始就順風順水的組合.Twins二人開始分別經歷一個又一個波折.曝光率減少.數年才出一兩首新歌.令Twins逐漸走出我的世界.最近這十年.我聽得更多的是c allstar.是濕趴.是dearjane.
我以為我已經將她們淡忘了.但當sherley跟我說我們五月四號要做組合專場.我第一個想到並確定的.依然是孖女.這讓我想起.這些年來.雖然我已經好少聽Twins.但係每逢有佢哋嘅新聞.我都會格外留意.每逢阿sa主演嘅電影.我都盡量去戲院支持.
終於我明白了.對她們的愛.早已深至骨髓.對我們這一代而言.Twins從不只是一個偶像.她們是與我們一起成長的朋友.當熟悉的旋律響起.內心湧起的遠遠不只是一句「好好聽」咁簡單.湧起的.學生時期的妳.湧起的.是名為青春的那份真摯.
Twins是一部時光記錄儀.記錄著你我青春的每一步.暗戀時有《女校男生》.熱戀時有《戀愛大過天》失戀時有《丟架》.畢業時有《我們的紀念冊》.每一個重要的人生節點.都可以用Twins的歌作為註腳.她們用陪伴來撫平一切傷痕.
而這份陪伴
足足二十年
已是心頭肉
已成無價寶
最後送上二十年紀念新歌
MV同埋歌詞中收埋咗好多彩蛋
唔知你發現咗幾多
但有一個你可能會忽略咗
仔細聽intro
聽唔聽到
「問愛戀易學難精可否惡補」
用二十年後的歌
呼應二十年前
她們的第一首歌
或者你亦有一段不老青春
可能名為suppermonent
可能名為草蜢
可能名為Beyond
而我的那一段
叫Twins
孖女
二十週年快樂
晚安
飲歌跟你合唱唱到世態的轉變都看過
仍是那樣諧和
六歲很快過 又似不快過
驟眼彼此也大個 可愛在每分鐘也不枉過
回望身世 因工作未顧安危
被天氣炎涼洗禮 卻有你天使般安慰
共渡浮世 有幸攜手便能拋開一切
未來未曾計 大無畏
為了事業念力沒有降低
假如感激我運氣 不如多得有著你
投緣難講理 歎世界 亦要牽手上機
一人一口氣做到未洩氣 沒法不一起
這種不捨不棄 大過天和地
我肯交換去做你
像置身銀河 年月飛快過
共你分享對或錯
苦與樂記得生涯怎麼過
從沒心計 天真歲月已一齊
幸福似季候交替
你卻永遠企在旁像護堤
望著時計 便懷念怎樣聯手解決一切
未來未曾計 大無畏
陪你落下熱淚亦撐到底
假如感激我運氣 不如多得有著你
投緣難講理 歎世界 亦要牽手上機
一人一口氣做到未洩氣 沒法不一起
這種不捨不棄 大過天和地
我肯交換去做你
彷如孖女這份愛願叫世間知己
記得不捨不棄 沒有猜和忌 我肯交換去做你 我的感覺也屬你
E.N.D
